பாகம்-18

இப்பகுதியில் ஸமஷ்டியபிவாதநம் என்னும் நமஸ்கார மந்த்ரங்கள், செய்முறை மற்றும் அர்த்தம் பற்றி பார்க்கலாம்.

ஸம்ஷ்ட்யபிவாதனம் ||18||

ஸந்த்யாயை நம: | ஸாவித்ர்யை நம: | காயத்ர்யை நம: | ஸரஸ்வத்யை நம: | ஸர்வாப்யோ தேவதாப்யோ நமோ நம: ||

காமோऽகார்ஷீன் மன்யு-ரகார்ஷீந் நமோ நம: ||

அர்த்தம்:

ஸமஷ்டி அபிவாதனம் – (ஸந்த்யாயை நம:) ஸந்த்யா தேவிக்கு நமஸ்காரம். (ஸாவித்ர்யை நம:) ஸாவித்ரீ தேவிக்கு நமஸ்காரம். (காயத்ர்யை நம:) காயத்ரீ தேவிக்கு நமஸ்காரம். (ஸரஸ்வத்யை நம:) ஸரஸ்வதீ தேவிக்கு நமஸ்காரம். (ஸர்வாப்யோ தேவதாப்யோ நமோ நம:) எல்லா தேவதைகளுக்கும் மீண்டும் மீண்டும் நமஸ்காரம். (காம: அகார்ஷீத்) காமமே செய்தது, (மன்யு: அகார்ஷீத்) கோபமே செய்தது – நான் செய்த பாவமெதுவும் வேண்டுமென்று மனமொப்பி செய்ததன்று; காம, க்ரோத வசத்தால் அறியாமல் நிகழ்ந்து விட்டதால் பொறுத்தருள வேண்டும். (நமோ நம:) தேவர்களே! உங்களைப் பன்முறை வணங்குகின்றேன்.

செய்முறை:

ஜபம் செய்த திசையிலிருந்து ஆரம்பித்து, வரிசையாக நான்கு திசைகளிலும் (உதாரணமாக) கிழக்கு நோக்கி ஸந்த்யாயை நம:, தெற்கு நோக்கி ஸாவித்ர்யை நம:, மேற்கு நோக்கி காயத்ர்யை நம:, வடக்கு நோக்கி ஸரஸ்வத்யை நம: என்று அஞ்சலி செய்து, முடிவில் ஜபம் செய்த திசையில் “ஸர்வாப்யோ தேவதாப்யோ நமோ நம:” என்றும், “காமோऽகார்ஷீன் மன்யுரகார்ஷீந் நமோ நம:” என்றும் அஞ்சலி செய்து வணங்க வேண்டும்.

இதற்குப் பின் அபிவாதன நமஸ்காரம். இப்பகுதியில் மந்த்ரத்தின் மாதிரியைத் தந்திருக்கிறேன். இதில் கோத்ரங்கள் இருபது வகைகள், அந்த இருபது வகைகளும் நால்வித ரிஷிகள் கூட்டணியில் இருபது ப்ரவரங்களில் (சந்ததி) அமைந்துள்ளன. அவற்றை ஒரு பட்டியல் வடிவில் அடுத்த பகுதியில் தருகிறேன். அந்தப் பட்டியல் அடிப்படையில் படிக்கின்றவர்கள் அவரவர்களுக்குரிய கோத்ரப்படி தன்னுடைய பெயரைச் சொல்லி (இங்கே, பெயர் என்பது பொதுவாக சான்றிதழ்களில் உள்ள பெயர் அல்ல; உபநயனத்தின் போது வைக்கப்படும் பெயரைச் சொல்ல வேண்டும். உதாரணமாக, சான்றிதழ்களில் ரமேஷ் என்றிருக்கும்; ஆனால் உபநயனம் செய்விக்கும்போது சிலர்/பலர் தங்களுடைய முன்னோர்களை மறக்காமலிருக்க வேண்டி, உபநயனம் செய்விப்பவரின் தந்தை அல்லது தாத்தா பெயரைச் சூட்டுவது வழக்கம். அதன்படி வெங்கட்ராமன் என்றோ, நாராயணசாமி என்றோ பெயர் சூட்டுவர்.) அபிவாதன நமஸ்காரம் செய்யும்போது அவ்வாறு தனக்குச் சூட்டிய பெயரைச் சொல்லி நமஸ்காரம் செய்ய வேண்டும். இப்போது அந்த மாதிரி நமஸ்கார மந்த்ரத்தைப் பார்ப்போம்.

அபிவாதயே (ஆங்கிரஸ-பார்ஹஸ்பத்ய-பாரத்வாஜ) த்ரய-ஆர்ஷேய ப்ரவரான்வித (பாரத்வாஜ) கோத்ர:, (ஆபஸ்தம்ப) ஸூத்ர: (யஜு:) சாகாத்யாயீ ஸ்ரீ (ஜெயராம) சர்மா நாமாஹம் அஸ்மி போ: ||

(ஆங்கிரஸ- பார்ஹஸ்பத்ய-பாரத்வாஜ) ஆங்கிரஸர், பார்ஹஸ்பதி, பரத்வாஜர் என்ற மூன்று ரிஷிகளை கோத்ர ப்ரவர்த்தர்களாயுடைய (பாரத்வாஜ கோத்ர:) பாரத்வாஜ கோத்ரத்தில் பிறந்தவனும், (ஆபஸ்தம்ப ஸூத்ர:) ஆபஸ்தம்ப ஸூத்ரத்தின்படி கர்மங்களை அனுஷ்டிப்பவனும், (யஜு: சாக அத்யாயீ) யஜுர்வேதத்தை அத்யயனம் (பயிற்சி) செய்பவனும், (ஸ்ரீ ஜெயராம சர்மா நாம அஹம் அஸ்மி) ஸ்ரீ ஜெயராம சர்மா என்ற பெயரை உடையவனும் ஆகிய அடியேன், (போ:) ஸர்வ தேவ தேவிஸ்வரூபியான பகவதி! (அபிவாதயே) உனது பாதகமலங்களில் வணங்குகிறேன்.

செய்முறை:

இருகாதுகளையும் உள்ளங்கைகளால் தொட்டுக் கொண்டு இம்மந்த்ரங்களைக் கூறி முடிவில் தன் பாதங்களையும், கால் கட்டைவிரல்களையும், பூமியையும் இரு கைகளாலும் தொட்டுவிட்டு, ஸந்த்யாதேவியை நினைத்து வணங்க வேண்டும்.

(பெரியவர்கள் கையில் ஸமித்து, புஷ்பம், தர்ப்பை, நெய், நீர், மண், அன்னம், அக்ஷதை முதலியன வைத்திருந்தாலும்; ஜபம், ஹோமம், தேவபித்ரு காரியமோ செய்து கொண்டிருந்தாலும்; ஈர வஸ்த்ரத்துடன் இருந்தாலும்; அசுத்தமாக இருந்தாலும் அவர்களுக்கு அபிவாதனம் செய்யக் கூடாது.)

முக்கியமான வேதங்கள் அடிப்படையிலான ஸூத்ரங்கள், கோத்ரங்கள், ப்ரவரங்கள் பற்றியும், அவைகுறித்த பட்டியலையும் அடுத்த பகுதியில் பார்க்கலாம்!